阮若打開心內的門窗

詞:王昶雄 曲:呂泉生



阮若打開心內的門,就會看見五彩的春光,

雖然春天無久長,總會暫時消阮滿腹辛酸。

春光春光今何在,望你永遠在阮心內。

阮若打開心內的門,就會看見五彩的春光。



阮若打開心內的窗,就會看見心愛彼的人,

雖然人去樓也空,總會暫時給阮心頭輕鬆。

所愛的人今何在,望你永遠在阮心內,

阮若打開心內的窗,就會看見心愛彼的人。



阮若打開心內的門,就會看見故鄉的田園,

雖然路途千里遠,總會暫時給阮思念想要返,

故鄉故鄉今何在,望你永遠在阮心內。

阮若打開心內的門,就會看見故鄉的田園。



阮若打開心內的窗,就會看見青春的美夢。

雖然前途無希望,總會暫時消阮滿腹的怨嘆,

青春美夢今何在,望你永遠在阮心內。

阮若打開心內的窗,就會看見青春的美夢。




markyslin 發表在 痞客邦 留言(0) 人氣()